O pasado venres 23 de outubro celebráronse na Facultade de Fisioterapia da Universidade da Coruña as VI Xornadas de Fisioterapia e Saúde, centradas na fisioterapia oncolóxica, o exercicio terapéutico e a abordaxe clínica especializada.
A xornada comezou cunha mesa inaugural na que participaron o Reitor da Universidade da Coruña, o Presidente da Xunta Provincial da Asociación Española Contra o Cancro (AECC), xunto coa Decana, a Vicedecana e o Director do Departamento de Fisioterapia. Contou con cerca de 170 participantes entre estudantado, profesionais e profesores.
Entre os relatores participaron un oncólogo e seis fisioterapeutas especializados en Fisioterapia oncolóxica, que abordaron o papel do exercicio terapéutico en diferentes tipos de cancro, así como a súa contribución á prevención e ao tratamento das secuelas derivadas da enfermidade e dos seus tratamentos. Tamén se trataron aspectos relacionados co coñecemento do proceso asistencial e das características e necesidades de cada paciente, que condicionan a prescrición e o axuste da dose de exercicio terapéutico. Varios relatores salientaron que o exercicio terapéutico, supervisado por profesionais sanitarios, constitúe unha parte esencial da atención oncolóxica polos seus beneficios sobre a capacidade funcional, a calidade de vida e a supervivencia.
Un dos momentos máis enriquecedores foi a mesa moderada por Inés López Simón, fisioterapeuta da AECC da Coruña, na que participaron pacientes que compartiron as súas experiencias. Este espazo complementou a perspectiva profesional das relatorías cunha visión directa das vivencias e necesidades das persoas afectadas, favorecendo unha maior comprensión do impacto da enfermidade máis alá dos seus aspectos físicos.
Esta combinación de coñecemento científico e experiencias persoais resultou especialmente valiosa para o alumnado asistente, ao permitir comprender non só as necesidades físicas das persoas con cancro, senón tamén a importancia das habilidades interpersoais na práctica clínica, como a empatía, a escoita activa, a comunicación e o acompañamento ao longo do proceso da enfermidade.
En conclusión, as VI Xornadas de Fisioterapia e Saúde constituíron unha excelente oportunidade para actualizar coñecementos sobre Fisioterapia oncolóxica e reforzar o papel do exercicio terapéutico como parte fundamental da atención ás persoas con cancro. A participación de profesionais e pacientes puxo de manifesto a importancia de combinar a evidencia científica e as competencias técnicas cunha atención humanizada e centrada na persoa
